Skip to content
Back to all stories
Written story Disappointment

عيشوا عيشة أهاليكم

يعتقد أنه لا يكذب ، بل يتجمل ، ولكنه في الحقيقة كذاب كذاب كذاب

ع عماد عزيز
25 views 1
عيشوا عيشة أهاليكم
عيشوا عيشة أهاليكم !!!! حمادة خلص ثانوية عامة ودخل كلية علوم ، ابوه أجّرله سكن مع أصحابه وقدم وبدأ دراسة ومحاضرات بعد ما اشترى طاقمين تلاتة للكلية كنوع من انواع التعايش مع الواقع أبوه موظف على قد حاله شغال في مجلس قروي عامل خدمات او عامل نظافة ومش عيب طبعا ، دا الشغل شرف وكرامة ، المشكلة هنا مش في شغل الأب ولا الأم حمادة شاف ولد وبنتين من بتوع بابي ومامي بيهزروا مع بعض ، وورا مبنى الكلية مجموعة شباب وبنات هاتك يا ضحك وفرفشة وهزار وهو يدوب مصاحب مدبولي ابن خالته ، يروحوا كافتيريا الجامعة يشوف رامى معاه في الدفعة جايب صينية مليانة سندوتشات شاورما وكانزات وجايب لزمايله الاولاد والبنات وهو لو طلب كباية شاي يبقى مكسوف ، كل اللي كان معيشُه الدور انه بيطلب الشاي في كباية السفري الكرتون عشان معتقد ان دي بتديله برستيج يعني حمادة كان يرجع من الكلية يوم الاربعاء ويسافر الجمعة ، وهو مسافر يطلب من ابوه مصاريف الاسبوع ، أكيد طبعا ابوه بيحاول يدبرله المبلغ لانه معاه اخوات تاني والمرتب على شغل أمه في تجارة الخضار يدوب ماشية معاهم بالضالين امين وهو مسافر ابوه يطبق ايده في ٣٠٠ جنيه من لحم الحي ويقوله نفس الكلمتين ( دبر أمورك بدول لغاية ما ربنا يفرجها ) ، الواد ياخد الفلوس وضارب بوز ومش طايق نفسه ومخنوق من وضع ابوه وظروفه حاول يشتغل في كافيه فترة مسائية عشان يبقى معاه فلوس زي زمايله ويعرف يعزم البنات ، مش عشان يساعد ابوه ، للأسف ما كنش ده هدفه قرب نهاية السنة كان حمادة عاش دور تاني خالص بعد ما اندمج مع الشلة قعد فترة ما يروحش البيت وابوه يبعتله ال ٣٠٠ جنيه مع حد من اصحابه أمه اشتاقت عليه قوي ، ست مكافحة وغلبانة ولبسها على قد ظروفها وشكلها مش اللي هو بالنسبة لأمهات باقي الشلة قالت هروح ازوره وخدتله برطمان جبن صغير مع برطمان لفت مخلل على شوية خيار أهو حاجة تساعد معاه وخلاص أمه دخلت السكن يا مؤمن وهو قاعد هزار وضحك بصوت عالي مع اصحابه وجرس الباب رن ، يقوم واحد من اصحابه يفتح يلاقي الست الغلبانة على الباب ، انتي مين يا ست ، قالتله الأستاذ حمادة موجود ( حبت تفخم من ابنها قدام زمايله ) ، قالها باستهزاء ( أيوة الاستاذ حمادة موجود ) وهيموت على نفسه من الضحك على كلمة الاستاذ حمادة وعلى منظرها وشكلها ، نادى على حمادة تعالى شوف مين عاوزك ، طلع حمادة لقاها أمه ، كانت منتظرة الواد يجري عليها يحضنها ويبوس إيديها ويقول لاصحابه دي أمي ، وهو فخور انها بتكافح عشان تعلمه ، لكن رد الفعل كان صعب جدا على أي أم ، مقابلة جافة خالص ، خد منها اللى جايباه وراح ركنه تحت ترابيذة في المطبخ وغطاه بحتة قماش عشان اصحابه ما ياخدوش بالهم ، والمصيبة الكبرى التي تسببت في لعنات الله عليه ، ان اتنين من اصحابه طلعوا يشوفوه اخر ليه على الباب لقوه بيتكلم معاها من عالباب وحتى ما قالهاش اتفضلي فسألوه ( ايه يا ابني مالك واقف ترغي بقالك ساعة ، ومين دي ؟ كان أصعب رد ممكن تسمعه أم وجاوبهم وهو مدور وشه بعيد عنها وباصص لاصحابه وبيحاول يوطي صوته عشان هي ما تسمعوش ( دي واحدة خدامة بتلف تمسح الشقق للطلبة ) الأم للأسف سمعته مش هكمل ، كملوا انتوا بتعليقاتكم

Readers' votes

1

people liked it

Did this story reach you?

Your vote helps it reach more people.

ع

Told by

عماد عزيز

On the shelf since 10 November 2026