Back to all stories
Written story
Turning points
حكاية كلب
لما ربنا يديلك ما تنساش أصلك وافتكر دايما ان اللي فيه من فضل ربنا وليس من فضلك
ع
عماد عزيز
4 views
0
( حكاية كلب ) رقم ١ _ من سلسلة روايات ( ماذا وراء الستار ) من تأليفي
كلاب المنطقة لاحظت كلب غريب متردد على المنطقة ، عملوله كمين وجابوه لملك الكلاب ، لما سأله ملك الكلاب : انت مين وإيه اللي جابك المنطقة بتاعتنا
الكلب الغريب جاوبه : ياريسنا انا اتخنقت من مملكتنا ، مليانة ظلم وكل كلب شامم نفسه على التاني ومحدش بيراعي غيرُه ، ولا الصغير بيحترم الكبير ، واللي قاعد على كرسي حاسس انه إله وسلطان ، والغني مستعبد الفقير
ملك الكلاب نظر إليه نظرة شفقة وخد قراره وقال سيبوه يعيش وسطينا يحمي معانا المنطقة ومن انهاردة هيكون دراعي اليمين
يوم في اتنين في تلاتة الكلب الغريب شم نفسه على باقي الكلاب وعلى كل مملكة الكلاب وبقى يأمر وينهي
وفي يوم من الأيام اتجمعوا الكلاب خلف بيت مهجور وقالوا لازم نخلص منه ، وعملوله كمين مرة واتنين والتالتة تابتة ، مسكوه قعدوا يعضعضوه وضربوه لغاية ما كسروا عظمُه ، لغاية ما ملك الكلاب لاحظ انه اختفى مرة واحدة ودار يفتش عنه في كل الشوارع والحواري ، وزي ما احنا عارفين ان كل مكان فيه عصافير ، جه كلب صغير حكاله كل اللي حصل ،
ملك الكلاب جمع كل الكلاب وكان مصمم يعرف مين اللي دبرله المكيدة
وبالفعل عرف مين اللي عمل كدة من الكلاب وجابهم للمحاكمة قدام كل الكلاب وكان مصمم يقرقش عظمهم قدام الكل عشان يبقوا عبرة
لكن طلع كلب يدافع عنهم قبل ما ياكلهم بأسنانه وقال : يا ملكنا الهمام المفترس ، هما مش غلطانين لكن الغلط كله عندك انت
قالُه هاو هاو هاو ازاي ، قال هاو عشان خليت الغريب اللي ما صانش عيشة أهله وخانهم وسابهم يبقى هو الآمر الناهي في المملكة فكان من الطبيعي ان كل كلاب المملكة تكرهُه وتقطعله ذيلُه ، ولما شاف ملك الكلاب ان كل المملكة عاملة ثورة وعمٌال تهوهو وتتنطط ، قال اطردوه برة المملكة
فَرِحت الكلاب وجروه من ذيله لخارج المملكة وقطّعوا اودانه الطويلة وقطعوا ذيله ورموه .
الخلاصة :
* لما ربنا يديك ما تفتريش
* لما توصل لمنصب اوعى تنسى أصلك
* لما تلاقي عيب في حد يخصك حاول تصلح مش ترميه وتسيبه
* لما تسيب مكانك وتمشي ما تحاولش تذم في اللي عاشوا معاك وتشوه صورتهم
* لما تيجي تِرضِي ، إرضِي ربنا ، مش ترضي ملك الكلاب ...... لأنك نزلت والا طلعت انت في الآخر اسمك كلب ( والعبرة لمن يعتبر )
From the same shelf
