Back to all stories
Written story
Family
هكذا تعلمت من والدي
والدك لم يكن أفضل مدرس و لكن كان لديه القدرة علي إيصال المعلومه
R
Reem Ghozal
14 views
0
اعتقد اكتر حاجه لسه لسه فاكراها للنهاردة بعد وفاة والدي هي القصص و الحكايات التي لا تنتهي و اللي اتعلم منها و علمنا منها كتير.
هو كان دايما بيحكي قصص و نقعد نضحك علي المواقف اللي حصلت و مر بيها من حكاياته في الجيش مع صحابه و انه مره هرب من المعسكر شويه علشان يحضر ماتش كورة مع خطورة الموقف و قد ايه زميله كان خايف و مخرجش معاه.
او مغامراته في السفر ليبيا زمان و طبيعه الحياه هناك و عن جمال المدن الليبيه و بيوت المغتربين لقواعد و قوانين غريبه في فترة حكم القذافي
و السفر و الترانزيت في اليونان و في تونس و تجربه أكلات غريبه في كل دولة بيروحها
و الرجوع لمصر و حتي لما سافرنا اليمن معاه و جبالها و شوارعها و صنعاء و عادتها المختلفه و و عشنا فترة هناك كان فيها مخاوف كتير في أوائل التسعينات و رجوعنا بعدها لمصر
لتبدأ رحله من مغامرات و حكايات كتير مع التدريس للطلبه في الازهر و حوارات المراهقين و صعوبه التعامل مع الولاد
مرة طلعت رحلة و قابلت فيها مدرس تلميذ لوالدي و قالي الجمله اللي كتبتها فوق
انه اختار والدي في فترة انه ياخد عنده درس مقارنه بمدرس آخر ممتاز بس هو اختار والدي علشان قدر يفهم منه المعلومه
رغم ان والدي كان خريج كليه علوم قسم رياضه بحته
يعني مش خريج كليه تربيه بس سبحان الله دي كانت مهارة عنده في إيصال المعلومه و شرحها سواء عن طريق السرد او انك تشرح الموضوع بشكل عام و بعدين تبدأ تجزئتها
و ده اللي أثبته العلم عن طريقه تفكير المخ ان عقلنا بيتذكر القصص و الحكايات لانها بترتبط بمشاعرنا و كمان بيفهم اكتر لما تديله جرعه كبيرة و تبدا بعد كده تقسمها و استخدام التشبيهات و الكنايات بيساعدك تفهم و تحفظ المعلومه بشكل اعمق
من الحكايات اني مرة حكمت علي شخص في موقف بناء علي راي شخصي و كلام سمعته عنه من شخص آخر بناء علي تجربتي انا الشخصيه
فوالدي رحمه الله قالي مينفعش تستخدمي القياس علي رأيك الشخصي و حكي لي قصه الخصمان و سيدنا داود و من يومها لا أصدر حكما الا بعد ان استمع للطرفين
و اكتشفت ايضا اني تعلمت منه عن طريق القدوة فأحببت العطور لحبه لها و هو كان يحب الاحتفاظ بأشياء و المحافظة عليها و ايضا إصلاح الأشياء و الفك و التركيب
و لا انسي انه كان محرمي في اول عمرة حيث كانت لا يجوز السفر الا بيحرم
و الكثير و الكثير من الذكريات اتمني عندما يتوفاني الله ان يتذكرني اولادي كما اتذكر ابي